Монголын телевизийн реклам бүтээгчдийн ур чадварын асуудалд

 “Судалгааг үл ойшоон реклам сурталчилгаа бүтээгчид нь дайсныхаа дамжуулж буй нууц дохиог тайлж уншилгүй орхиж буй генералуудтай эгээ л адил аюул тоссон хүмүүс”                                    

                                                                                                            Дэвид Огилви

            Өдгөө рекламны тэргүүлэгч хэрэгсэлд телевиз зүй ёсоор тооцогдож байна. Монголын рекламын түүхийг эргэн сөхөж үзвэл 20-иодхон жилийн настай ч чамгүй их амжилт олсон гэдэг нь бидний өнөөдөр үзэж харж буй рекламаас бэлхэнээ мэдрэгдэж буй билээ. Ялангуяа телевизийн рекламын өнгө будаг, ур хийц,  санаа оноо өдрөөс өдөрт сайжирч байна. Монголын үүрэг операторууд, томоохон худалдаачдын  өрсөлдөөн телевизийн рекламын хөгжлийг ахиулахад чухал үүрэг гүйцэтгэж байна.

Энэ удаад рекламын судалгаа гэдэг ойлголтод түшиглэн Монголын телевизийн рекламын ур чадварт дүн шинжилгээ хийх зорилгыг өмнөө тавилаа.

Аливаа салбарын хөгжил  тухайн салбарынхаа суурь онол дээр тулгуулан хөгждөг гэдгийг хэн бүхэн мэднэ. Тэгвэл би илтгэлийн өмнө энэ тухай бага зэрэг тодруулга хийхийг хүсч байна. Рекламын амин сүнс бол судалгаа гэдэг. Рекламыг бүтээгчид шинжлэх ухааны үндэслэлтэй, сайн судалгаан дээр үндэслэн бүтээгдэхүүн дэх хэрэглэгчдийн хандлагыг илрүүлж, бараа бүтээгдэхүүний давуу болон сул талыг нээж, түүн дээрээ үндэслэсэн рекламыг хэнд, хэрхэн хүргэхээ тооцоолдог. Гэтэл манай рекламны агентлагийн зарим уран бүтээлчид рекламын сайхан санааг гүрүүшиг пивоны ард олдог гэх нь бий. Өөрөөр хэлбэл тэд судалгааг үгүйсгэдэг. Харин  би судалгаа хэрэгтэй болохыг нотлохыг оролдъё.

Дэлхийн тэргүүлэгч рекламын агентлагууд нь 4 томоохон албадаас бүрддэгийн нэг нь маркетингийн алба юм. Маркетингийн албанд зах зээл, бараа бүтээгдэхүүн, хэрэглэгчийн гээд цогц судалгаа хийдэг судалгааны том баг ажиллаж байдаг. Тэд рекламыг бүтээхээс өмнө, бүтээж байх явцдаа, мөн дараа нь судалгаа хийж үр дүнг тооцож үздэг байна. Хэрвээ манай уран бүтээлчдийн бодож байгаа шиг судалгаа гэдэг зүйл хэрэггүй байсан бол тэр олон зуун хүнд цалин хөлс олгож ажиллуулах шаардлага хаанаас гарсныг таахад бэрх.  Мөн өндөр хөгжилтэй орнуудад судалгаагаар дагнасан үйл ажиллагаа явуулдаг, олон мянган хүний бүрэлдэхүүнтэй судалгааны компаниуд ч бас бий. Тэдний судалгааг худалдан авагчдын багагүй хэсгийг рекламын агентлагийхан бүрдүүлдэг байна.

Онолын хувьд дээр өгүүлсэнчлэн рекламын судалгааг кампанит ажлын өмнөх үеийн, рекламыг бүтээх явц дахь, рекламыг бүтээсний дараа үеийн гэж 3 ангилж үздэг. Рекламын кампанит ажлын өмнөх үеийн судалгаанд бараа бүтээгдэхүүний, зах зээлийн, хэрэглэгчдийн гэсэн 3 төрлийн судалгааг хийсний үндсэн дээр рекламаа бүтээдэг байна.

Кампанит ажлын өмнөх үеийн судалгааны жишээг та бүхэнд өгүүлье. Рекламын загалмайлсан эцэг Дэвид Огилвийн рекламын агентлаг тендерт 137 агентлагаас шалгарч    Америкийг Европт даяар сурталчлах эрх олж авчээ. 

Мэдээж ажлаа судалгаанаас эхэлсэн бөгөөд сурталчилгааны өмнө хийсэн судалгаанаас европчууд Америкт жуулчлахад  өндөр үнэтэй  гэсэн ойлголттой байв.  Тийм учраас “Та төсөөлж байгаагаас хавьгүй хямд үнээр Америкт жуулчилж болно” гэж бичихийн тулд  үүнийгээ батлах, цаашилбал,  тодорхой үнэ зааж долоо хоног Америкт жуулчлахад ердөө л 35 фунт стерлинг шаардлагатай гэж сурталчилжээ.  Дундаж орлоготой хүмүүст хүчтэй нөлөөлөх  үнийн энэ доод хэмжээг гаргахын тулд  тэд  олон зочид буудлын үнийг судалж байв. Жишээлбэл, дунд зэрэглэлийн  “Winslow” зочид буудлын нэг өрөө нь тухайн үедээ хоногийн 6 доллар байдгийг тогтоожээ. 

Урьд өмнө нь Америкт Европ тивээс зөвхөн бизнесменүүд, баячууд л ирж байв.  Улсад гадаад валютын нөөц шаардлагатай байгаа учир жуулчдын тоог нэмэгдүүлэхийн тулд  дундаж орлоготой  хүмүүсийг энэ сурталчилгааны кампанит  ажилд хамруулах хэрэгтэй байлаа.

АНУ-ын гэр бүлийн тал хувь нь 2000 фунт стерлингээс дээш орлоготой байхад Англи гэр бүлийн зөвхөн 3 хувь нь  ийм хэмжээний орлоготой. Тиймээс хамгийн доод үнийг дурьдах нь оновчтой байв

Дундаж  орлоготой Европчуудад мөнгөө хэмнээд ирвэл Америкт үзэж харах, танилцах зүйл ихтэй гэдгийг нотлохыг оролджээ.  Түүний тулд юутай ч зүйрлэшгүй тохилог хот,  байгалийн сонин  тогтоцтой газар гэхчилэнгээр өгүүлж байв.

            Энэ сурталчилгааны кампанит ажил маш амжилттай болж үүнээс найман сарын дараа  Америкт Францаас ирсэн жуулчдын тоо 27 хувь, Английн  жуулчдын тоо  24 хувь,  Германаас ирэгчдийн тоо 18 хувиар тус тус өссөн билээ.

Ийнхүү үр дүнтэй судалгаан тулгуурласан реклам ийнхүү амжилттай болжээ.

Рекламын кампанит ажлын өмнөх судалгааг ийн ашигладаг бол  явц дахь, мөн дараа үеийн судалгааны янз бүрийн тестийн аргууд байдаг. Рекламаа үзүүлээд бараа авах сэдэл төрж байгаа эсэх, эргэн санаж байгаа эсэх, үзэл бодол, төсөөлөлд нь ямар өөрчлөлт орсон, мэдлэг нь хэр нэмэгдсэн эсэхийг нь  танддаг ажээ.

Харин Монголын зарим реклам бүтээгчид судалгааг үгүйсгээд гүрүүшиг пивоны ард ямар санааг олдог вэ? Үүний хариултыг Монголын телевизүүдийн рекламаас харж ангилал хийн хариулахыг оролдлоо.

1.         Нэг нэгнээ хэтэрхий хуулбарладаг.

“Намайг Амараа гэдэг. Би сүү уух дуртай. Гэхдээ үнээгээ хөхдөггүй. Зүгээр дэлгүүрээс сүүгээ худалдаж аваад цай чанаж уудаг ... Би соёмбот төрөө дээдэлсэн монгол хүн...” гэх “Соёмбо ” архины , “Намайг Амараа гэдэг..Би цэцгийн толгой тасддаггүй үртэй байхыг хүснэ, цэцдийн толгойг тасддаггүй төртэй байхыг хүснэ...” гэх Монголын Ардчилсан Холбооны ,

            “Намайг Номин гэдэг ...Би вино , наборт хууртахаа больсон монгол эмэгтэй ...” “Номин электроникс ” дэлгүүрийн реклам.

Энэ мэтчилэн нэг нэгнээ хуулбарласан рекламууд шил шилээ даран гарч ирж байгааг та бүхэн харж байгаа. Энэ бол тэдний олсон санаа. Нэг хэсэгтээ шинэлэгт тооцогдож хүмүүсийн анхаарлыг татаж байсан уг реклам “I am Canadian ” гэдэг Канадын рекламыг хуулбарласан бүтээл юм.

Увс нуурт зураг авалт нь хийгдэж, чамгүй өндөр өртгөөр бүтсэн “Чингис” пивоны “...Үүнээс цааш газар үгүй” хэмээдэг  түүхэн сэдэвтэй реклам тухайн үедээ телевизийн шилдэг рекламаар шалгарч хүмүүсийн сэтгэлд хоногшсон сайн рекламд тооцогдож байлаа. Гэтэл үүний дараахан Монголын рекламууд бүгд түүхэн болж хувирсан юм. Түүхэн сэдвээр бууз, майонез, хоолны газар гээд бүхий л зүйлийг рекламдсан юм. Гэтэл түүнээс их удалгүй “150” гэгч тааварт реклам гарч, нэг их удалгүй тэр нь MCS компаний 150 төгрөгийн үнэтэй ундаа болох нь тодорч, түүний араас мөн л шил шилээ даран ”Есүхэй”, “800”, “Гоё”, “Өгөдэй”, “Мануэл ”зэрэг тааварт рекламнууд хэрэглэгчдийн толгойг гашилгах болсон юм.

2.         Өрсөлдөгчдийн рекламыг нэг хэв маягаар хийдэг.

            Ийнхүү нэг нэгнээ хуулбарласан рекламууд нь өрсөлдөгчдийнх байх нь цөөнгүй. Жишээ нь, цагаан сараар идэвхждэг сүүний рекламуудыг эргэн саная. Өнгөрсөн жил дуучин Дэлгэрмөрөн, хийлчин Дээгий, боксчин Үйтүмэн гээд ододыг дүрээрээ сонгосон рекламууд олонд таашагдаж хэсэгтээ л ярианы сэдэв болж байв. Санаа нь ижил хөнгөн, хошигносон эдгээр рекламууд бүгд сүү үйлдвэрлэгчдийнх. Яг одоо би та бүхнийг эдгээр рекламын санаа, агуулгыг санаж байгаа боловч аль нь ямар үйлдвэрийн сүүний реклам байсан гэдгийг  ялгаж салган санаж байгаад эргэлзэж байна. Аливаа рекламд санаа чухал гэдэг нь маргашгүй боловч өрсөлдөгчдийн реклам нэг ижил байх нь ямар ч үр дүнгүй юм.  Реклам өндөр хөгжсөн орнуудад пүүсүүд рекламын өөрийн гэсэн хэв маягтай байдаг. Жишээ нь, Проктер энд Гэмбл хэзээ ч алдартай хүнийг рекламдаа тоглуулдаггүй, тэдний бүхий л сурталчилгаанд “баталгаа өгөх хэсэг” орсон байдаг, тэд хэрэглэгчдэд заавал нэг ашигтай зүйлийг амладаг, тэд сурталчилгааныхаа 60 хувьд туршилт хийж үзүүлдэг.

3.         Үр дүнтэй реклам хийдэггүй буюу бүтээгдэхүүнээ рекламддаггүй.

Санаа, хэв маяг нь адил дээрх рекламуудын  тухайд, дуучин Дэлгэрмөрөнгийн гоё цамц, охиных нь эгдүүтэй байдал, боксчин Үйтүмэнгийн жүжиглэх авьяас чадварыг хүмүүс шагшин ярьж байсан боловч сүүний тухай харин тэд төдийлөн санаж, ярьж байсангүй. Рекламын үнэ цэнэ гоё, сайхандаа биш харин бүтээгдэхүүнээ борлуулах чадвартаа байдаг гэдгийг энэ жишээ сануулдаг. Өөрөөр хэлбэл хэрэглэгчид рекламыг сайшаан магтаж байгаа боловч юу рекламдаж байгаа гэдгийг нь төдийлөн ойшоосонгүй.

Гол дүрээрээ Үйтүмэнг сонгосон энэхүү реклам Америк рекламын хуулбар бөгөөд энэхүү рекламанд Билл Клинтон, Наоми Кэмпэл нар тоглож байсан бөгөөд захиалагч нь Америкийн Шингэн Сүү Үйлдвэрлэгчийг Дэмжих Үндэсний Нийгэмлэг байв. Санал асуулгаар Америкчуудын хамгийн дуртай реклам болсон ч сүү нь мөн л дуртай ундаа болж чадаагүй ажээ.

“Проктер энд Гэмбл” ч рекламын үүрэг бол үр ашигтай харилцаа болохоос бус чамин, сонирхолтойдоо бус гэсэн бодлогыг баримталдаг бөгөөд уг харилцааг 3 хэмээр шалгадаг: эхийг бичигдэхэс өмнө, реклам хийгдсэний дараа, мөн туршилтын зах зээл дээр. Тэд хамгийн үр бүтээлтэй стратегийг тодорхойлохын тулд судалгаа хийдэг бөгөөд амжилттай хэрэгжүүлж буй стратегаа хэзээ ч өөрчилдөггүй байна.

4.         Тодорхой зүйлийг амладаггүй.

“Хэрэглэгчдэд юу ч амлаагүй сурталчилгаа ямар ч борлуулалт хийдэггүй атал сурталчилгааны ажлын ихэнх  нь ямар нэг зүйл амлаагүй байдаг”.                Дэвид Огилви

“Амлалт... бүр ихээхэн том амлалт өгөх явдал нь зар сурталчилгааны амин сүнс юм.”

Самуэл Жонсон

Энэ нь рекламдаж буй бүтээгдэхүүнүүдийн давуу буюу онцлог талыг рекламдаа тусгадаггүй гэсэг үг юм.  Реклам тодорхой зүйлийг амлаж байж амжилтад хүрдэг.  Хэрэглэгч бараа бүтээгдэхүүнийг бараа бүтээгдэхүүнийх нь хувьд худалдан авдаггүй, түүнээс гарах ашиг тус ханамжийг худалдан авдаг билээ. Бараа бүтэгдэхүүний ямар нэгэн чанар худалдан авалт хийхэд хүргэдэг гэсэн үг. Үүнийг тухайн бүтээгдэхүүн болоод хэрэглэгчдийн судалгаагаар илрүүлдэг.

Тэгвэл дээрх сүүний рекламыг авч үзье. Сүүний рекламууд дийлэнхдээ кальцитай, ясанд сайн, эрүүл мэндэд тустай гэсэн санаануудыг агуулжээ. Тэгвэл бүх л сүүнд кальци бий. Шүдний оог худалдан авахад амт, үнэр, найрлага, савлагаа, чанар гээд 28 үзүүлэлт худалдан авагчдын сонголтод нөлөөлдөг гэсэн судалгаа бий. Тэгвэл сүүг худалдан авахад төдий тооны үзүүлэлт хэрэглэгчдийн сонголтод нөлөөлөх нь тодорхой. Гэтэл судалгаа хийж үзээгүйн улмаас дээрх алдаа гарчээ гэж таамаглаж байна.

Сүү гэдэг бол монголчуудын өдөрт тутмын хэрэглээ. Яс, эрүүл мэндэд сайн гэж уухаасаа наана өдөрт тутмын хэрэгцээгэ хангаж сүүг худалдан авдаг. Тэгвэл олон сүүнээс алийг нь худалдан авах вэ гэдэг сонголтыг нь реклам хялбаршуулах учиртай юм.

Жишээ нь,  “Сүү” компанид 50 жилийн чанар гэдэг давуу тал байхаас гадна үнээний фермүүдтэй гэрээтэй ажиллаж малчдаас өдөр бүр сүүг худалдан авж сүүгээ хийдэг буюу хуурай сүүгээр найруулдаггүй гэсэн санааг дөвийлгөх, бүтээгдэхүүний нэр, савалгааг нь аваад үзсэн ч энэ бол  шинэ бас хуурай сүүгээр найруулаагүй гэдэг санаагаа хэлдэг.

Харин сайн жишээгээр “Наалдан пад” цавууны,  “Морьтой Чингис” архины рекламыг дурьдаж болно. Цуврал рекламууд нь “Наалдан пад” цавууг Монголын зах зээл дээр  гаргасан бол хэдий рекламдах нь хориотой бүтээгдэхүүнийх боловч “Морьтой Чингис” архины реклам бүтээгдэхүүнийхээ давуу талыг тодорхой гаргасан бөгөөд өөрөөр хэлбэл, тодорхой зүйлийг амлаж үр дүнд хүрсэн сайн реклам болжээ.

5.         Рекламын дүрүүд сөрөг хандлагыг төрүүлдэг.

Рекламд буй бас нэг сөрөг тал нь дүрийн асуудал байна. Монголын телевизийн рекламуудыг шүүж үзвэл цөөн хэдэн хүн рекламын байнгын нүүр царай болж байна. Жүжигчин Пүрэвсүрэн, хошиг шогийн жүжигчин Батаа,  дуучин Сарантуяа, ТВ коктэйл  хамтлагийн жүжигчид, дуучин Батсүх, хөтлөгч Учрал гэх мэт хэдэн хүний хүрээнд эргэлддэг. Дүр давтагдаж болох хэдий ч мөн л нэг төрлийн бүтээгдэхүүн үйлдвэрлэдэг өрсөлдөгч пүүсийн рекламд нэг хүнийг сонгож байгаа нь Монголын рекламд буй парадокс юм.

Дараах рекламыг үзье. /Мобиком, Юнителийн рекламд “ТВ коктэйл” хамтлагийн жүжигчид тоглосон реклам/ Үүрэн операторуудын рекламд баахан хөгжилтэй, жаргалтай залуус дүр бүтээдэг бөгөөд UBS телевизийн хөтлөгч Я.Учрал Ж мобайл, Скайтелийн рекламд дүрээ мөнхөлжээ.

6.         Хэрэглэгчдийг төөрөгдүүлдэг.  

“Мөнхийн үсэг” групп Монголд анх удаа хэвлэлийн 5 өнгийн машиныг  гаднаас оруулж ирээд рекламдаж байтал түүнээс хойно оруулж ирсэн өөр компанийн сурталчилгааг “Монголд анх удаа хэвлэлийн 5 өнгийн машиныг оруулж ирлээ” хэмээн рекламджээ. Гэтэл энэ тухай  Зар сурталчилгааны тухай хуулийн 21-р зүйлийн 1-д “Зар сурталчилгаа бүтээгч, түгээгч  тухайн зар сурталчилгаа үнэн зөв болохыг нотлох баримтыг зар сурталчилгаа захиалагчаас шаардах эрхтэй.” гэж заалт байдаг. Гэвч реклам бүтээгчид мөнгө л олж байвал  боллоо гэдэг үүднээс хандаж, энэ нь эцэстээ хэрэглэгчдийг төөрөгдүүлсэн реклам гарах үндэс болж байна.

1986 онд Парисийн Олон улсын худалдаа аж үйлдвэрийн танхимаас шинэчлэн гаргасан “Рекламны олон улсын ёс зүйн хэм хэмжээ”-нд “Дууриалган үйлдэх. Рекламны илгээлтийг бэлдэхдээ бусдын хийсэн рекламны илгээлтийн ерөнхий зохиомжоос эхлээд үг хэллэг, дүрс, утга агуулга, хөгжим болон дуу авианы чимгийг хуулбарлан дууриалгаж, худалдан авагчдыг төөрөгдүүлж болохгүй.” гэсэн заалт бий.

Мөн “Алтжин” бензинийг түргэн шуурхай шинжилдэг Европын стандартад нийцсэн лабораторитой боллоо гэсэн бичвэр явж, улаан шар малгай өмссөн эмэгтэй хил дээр цистернитэй бензинээс хуруу шилэнд дээж авч шинжилдэг өгүүлэмжтэй реклам бий. Энгийн хүн үүнийг “Алтжин” Монголд байхгүй лабораторийг оруулж ирж байгаа юм байна гэж ойлгоно. Гэтэл энэ нь ямар ч амьдралгүй реклам юм. Оросын тал вагон ачуулаад Монголын нефтийн ямар компанид, хичнээн тонн шатахуун, ямар вагоноор ачуулснаа тэмдэглэсэн дагалдах бичиг өгөхөөс гадна цистерний дээд талын тагийг лацаддаг. Тиймээс манай тал хэзээ ч хил дээр бензинийг шинжлэхгүй. Хэрвээ дээж авах бол Оросын талын лац ломбыг хөндөх болно. Тухайн лацыг “Алтжин” юм уу, “Петровис”-ын нефть бааз дээр ирсэн хойно нь вагоны дагалдах бичигийг үндэслэж байж хөнддөг. Мөн лаборатори гэж сурталчлаад байгаа нь бензиний октан болон бусад найрлагыг түргэн шуурхай хэмжих нэг төрлийн багаж. Нефть хүлээн авах агуулахад зайлшгүй байх ёстой. Өөрөөр хэлбэл “Алтжин” ийм багажтай болсон нь сайн хэрэг. Энэ реклам нь нэг талаасаа өөрийнхөө  онцлог давуу талаа харуулж чадсан сайн реклам болсон  нөгөө төлөөсөө хэрэглэгчийг төөрөлдүүлж байна.

Энэ мэтчилэн жишээг олныг дурдаж болно. Энэ бол дэлхийн рекламны практикт  байдаг рекламын судалгааг үгүйсгээд гүрүүшиг пивоны ард олж буй санаанууд юм. Энэ нь ямар сөрөг үр дагаварт хүргэдэг вэ?

“Мөнхийн үсэг” групп өөрийгөө сурталчлуулахаар манай нэгэн томоохон рекламны агентлагт ханджээ. Тэд “Мөнхийн үсэг” группын рекламыг “хэвлэлийн мангас” гэсэн санааг гарган рекламджээ. Монголд хэвлэлийн үйл ажиллагаа явуулдаг 200 гаруй том жижиг компани байдгаас тэргүүлэх 10 компани байдаг аж. Үүний дотор дээгүүрт бичигддэг тус группыг рекламдсан энэ реклам, энэ санаа үр дүнтэй болж, хэрэглэгчдийн таашаалд нийцэн, үр дүнгээ өгч байтал төдий л удалгүй тус студи рекламын энэ санаагаа өөр рекламд давтан “мангас” гэсэн санааг дахин гарган рекламджээ. Үүний дараа рекламны өгөөж буурч, компанид сөрөг хандлага мэдэгджээ. Харин “Мөнхийн үсэг” групп рекламны агентлагт энэ тухай эргэж мэдэгдсэн ч төдий л үр дүнд хүрээгүй байна.

Шалтгаан нь захиалагч төлбөр төлж бүтээлгэсэн рекламаа зохиогчийн эрхээр хамгаалуулж чадах гэрээг байгуулаагүйд оршиж байна. Монгол улсын Зохиогчийн эрх болон түүнд хамаарах эрхийн тухай хуулийн 18 дугаар зүйлийн 1-д “Захиалгаар туурвих бүтээлийн зохиогч захиалагчтай хийсэн гэрээний нөхцөлийн дагуу зохиогчид төлбөр төлөх үүрэгтэй .” 18.2-т “Захиалгаар туурвисан бүтээлийг ашиглах  онцгой эрхийг гэрээнд заасан этгээд эдэлнэ.” гэсэн заалт бий. Гэрээнд ийнхүү тусгаж өгөөгүйгээс рекламны ажилтнууд нэг ашигласан санаагаа дахин дахин ашиглахад хүргэж байна. Энэ бол асуудлын зөвхөн нэг тал гэж үзэж болохоор байна.

Гэтэл нөгөө талаас реклам бүтээгчдийн ёс зүйн асуудал хөндөгдөнө. Хүний хувьд, мэргэжлийн хүний хувьд захиалагчаа хүндэтгэж үздэггүй ёс тааруу реклам бүтээгчдийн асуудал нөгөө талаас урган гарч ирж байна.

Энэ мэт хандлагаас үүдээд тус компани рекламд таагүй хандах болжээ.Таагүй хандах гэдэг нь нэг хийсэн санаагаа дахин давтдаг, рекламны шинэлэг санаа байдаггүй, хэдхэн санааг тойрч гаргадаг болохоор рекламыг захиалагчид хараад л энэ бол тэр студийнх гэж амархан нэрлэж чаддаг болсон гэж тайлбарлаж байна. Харин дээрх групп рекламны орон зайгаа сайн маркетингийн менежерүүдээр нөхжээ. Шууд реклам хийлгэхээсээ татгалзаж маркетингийн менежерүүд биечилсэн сурталчилгааг хийх болсон байна. Ийнхүү зар сурталчилгааг захиалагчаа алдах нь реклам бүтээгч болоод түгээгчид хохиролтой гэдэг нь ойлгомжтой билээ.

Энэ санааг батлах рекламууд олныг нэрлэж болно. Хамгийн сайн, анхдагч, урьд өмнө байгаагүй шинэ технологи, та яарахгүй бол хожимдоно шүү, хямд үнэ, чанарын баталгаа гэх мэт ядмаг санаатай рекламууд хөвөрнө.

Ийнхүү рекламын салбарт буй энэ мэт зүйлийн шалтгаан нь мэргэжлийн боловсон хүчин цөөн, рекламчдыг давтан сургах гэсэн асуудалд зангилагддаг. Дээрх байдлаас гарахын тулд зар сурталчилгаа бүтээгчдийн давтан сургалтад хамруулах, мэргэжлийн рекламчдыг бэлтгэх, рекламны ассоциацийн үйл ажиллагааг сэргээх, рекламчдын мэргэжлийн ёс зүйн кодтой болох шаардлагатай байна.